|
Cu dispiaciri scrivu sti palori,
ma staiu vidennu ca Ribera mori.
A lu Dumila e dù semu
arrivati
e lu prugressu avanza ogni
mumentu,
ristamu di cuntinu sfiduciati,
pirchì Ribera mori ogni mumentu.
‘Nnarrè di certu nun vulemu iri,
nun si pò stari sempri cu sti peni,
la vita offri milli piaciri
ed è disìu di tutti stari beni.
|
Ma forsi stu paisi di Ribera
fa eccezioni e guai ‘nn’avi tanti,
si struggi, lotta sempri ogni manera
ma và ‘nnarrè, ‘nveci di iri avanti.
Strati e stratuna sù mali arriddutti,
si scàssanu e po’ restanu scassati,
ciascunu c’è abituatu e si ‘nni futti,
e pi tant’anni un vennu arriparati.
|
|
Quannu passàmu ‘nti sti strati rutti
cu machini o mutura semu fritti !
muccuna amari ognunu assà ‘nn’agliutti
e ormai si sunnu rutti…li marmitti !
In ogni agnuni c’è troppa munnizza
e nuddu ca la cogli o ca la spazza,
cu vidi e odura tutta sta schifizza
si rudi l’arma, sbràita e s’incazza.
|
Quarchi ‘mpiegatu è chinu d’alligrizza
e a malapena pulizia “la Chiazza”,
sta cosa di stu versu un s’addirizza
fin quannu c’è cu soffri di canazza !
L’acqua pi li campagni nunn’abbasta,
e semu stuffi di tanti prumissi,
c’è l’acquedottu ca è un sculapasta
e li problemi sù sempri li stissi.
|
|
La strata di Ribera a Siccagranni
è causa d’incidenti in quantitati,
l’aggiusterannu forsi fra vint’anni ?
va bè ! ormai ci semu abituati.
Mureru : Sagra e Fera Mercatu,
la Mostra fotografica ì a mali,
spirì la Mostra di l’Artigianatu
ed anchi la Rassegna Teatrali.
|
Lu Teatru novu e puru lu
Castellu
restanu pi l’eternu tali e quali
ed anchi si facemu gran
burdellu
rischiamu ca ‘nni futtinu ‘u Spitali.
Quarchi annu fa satà la
Ferrovia
e la Pretura l’appiru a livari,
iu criu ca si continua sta manìa
‘nni freganu anchi l’Acqua di lu mari !
|
|
Li nostri artisti e li tradizioni
ca sù lu vantu di la nostra genti
unn’hannu mai cunsidirazioni
ca a cu cumanna nun ci ‘mporta nenti.
Si spenninu dinari a beddu cori
pi vasi, pi sedili, pianti e sciuri,
la vigilanza campa tra l’allori
e duranu si e nò vintiquattr’uri !
|
La zona cchiù turistica a Ribera
è risaputu ca è Siccagranni
ma ccà si fa un’Estati a “tollallera”
pirchì si privilegianu atri banni.
“Tutte le feste al Tempio”
si po’ diri,
al “Lungomari” sulu quattru botti,
inveci a Borgu, c’è di ‘ncretiniri !
spittaculi e ballitti jornu e notti.
|
