Ribera è bedda, è bedda veramenti

è ‘na gran terra, ricca di misteru,

iu la dipingiu cu li sintimenti

e la offru a lu munnu tuttu interu.

Vistuta a festa pari ‘na regina,

la fama sò ‘nSicilia è propriu granni,

ci sù jardina,  suli e la marina

ca è canusciuta ormai in tanti banni.

Scurdamu si c’è quarchi strata rutta,

scurdamuni  si c’è quarchi difettu,

Ribera è bedda, è sempri bedda tutta

orgogliu è pi ogni figliu sò dilettu.

Nun ‘mporta si sù tanti ad emigrari,

pirchì nun c’è travagliu e c’è la crisi,

cu nesci prima o poi voli turnari

ca  nun si scorda mai chistu paisi.

Lassamu pi un mumentu l’amarizza

spirannu di iri sempri a migliurari,

sulu alligria vulemu e nò tristizza,

ca stu tesoru a tutti amà mustrari.

Iu la vulissi ogn’ura cchiù splinnenti,

cchiù rispittata e cchiù valurizzata,

‘na perla rara, un zaffiru splinnenti

comu ‘na picciuttedda ‘mprufumata.

Li pregi e li ricchizzi sunnu tanti,

c’è aria d’una eterna primavera,

amamula sta terra tutti quanti

chiamannula a gran vuci: - O mia Ribera !

Bedda Ribera, bedda a tutti l’uri,

farini un paradisu ognunu spera,

o terra d’oru, o terra di l’amuri,

sì bedda sì, sì bedda o mia RIBERA.