Ogni jovidi matina, propriu immancabilmenti,

sempri allegra mè muglieri, si pripara sveltamenti,

è un mumentu assai aspittatu, ccà a Ribera c’è mercatu !

Nun pò certu sistimari: letti, cammari e cucina,

iu mi cercu d’arrangiari pirchì è un ‘nfernu dda matina.

Mi rassegnu e com’e gghè, mi priparu lu cafè.

Avi sempri gran primura e veloci avà scappari,

curri lesta a prima ura, sinnò nenti po’ attruvari;

e mi dici : - Ciau ciau...centu EURU e mi 'nni vaiu !

metti in motu la sò Panda, e parti comu a Barrichellu !

‘mmezzu a sterru e strati rutti, di li scaffi… si ‘nni futti !

Gaia e allegra è arrivata, ‘mmezzu a centu e cchiù barracchi,

ch’è filici ! ch’è prigata ! e aumentanu li sacchi.

Và in cerca sulamenti, di li prezzi cchiù pirnenti !

- Talìa ccà chi bella offerta ! setti pacchi di mottini !

ottu scatuli di tunnu e quaranta formaggini !

Spissu nun ci ‘mporta nenti, si li cosi sù scadenti !

Piglia olivi e mandarini, passuluna e anchi patati,

cascavaddu e salamini, e anchi li sardi salati.

E un si scorda quasi mà lu gran beddu baccalà !

Spenni sordi pi cazetti, pi tuvagli e pi tendini,

cerca scampuli, collant, gonni, cazi e anchi vistini.

Dici: - sunnu rinfurzati ! e pi ghiunta sù scuntati !

a cuntallu un si ci cridi, si tirà ‘na matinata.

Finalmenti fa ritornu cu la testa ‘nta un fastornu.

Sfirnisciata piglia appunti, d’ogni cosa ca ha accattatu

e s’un quàtranu li cunti scappa arrè ‘nta lu mercatu.

Torna sempri tali e quali… senza un EURU pi signali !

Mentri vuddi la pignata ricontrolla li sacchetti :

- Matri mia chi fù stunata, mi scurdavu li spachetti !

- Anchi oggi a quantu pari, arrè ‘nsiccu amà mangiari !