1

La moda comu in epuca luntana,

di jornu e jornu cancia di cuntinu,

semu ‘nti lu Dumila e nunn’è strana

sta voglia pazza di telefoninu.

E’ addivintata ‘na vera manìa

e già si l’accattaru tanti e tanti,

pari ca fussi  vera epidemia

pirchì sta cuntagiannu a tutti quanti.

2

Ci nn’è d’ogni culuri e ogni putenza,

d’ogni modellu e d’ogni misura,

è l’urtimu giuiellu di la scienza

e lu sò costu a nuddu fa paura.

Ci ‘l’hannu artigiani e cummircianti,

li viduvi, li schetti e maritati,

duttura, artisti e rappresentanti,

ci l’hannu puru li disoccupati.

3

Ci l’hannu Giuanni, Peppi e Niculinu,

Caloiru, Pasquali e anchi Turiddu,

ci l’hannu puru Ciccu e Sarafinu,

Gilormu, Batassanu e anchi ‘Gnazziddu.

Lu zù Vicenzu l’accattà avantèri

e si lu porta quannu và a zappari,

prima ca torna avvisa a sò muglieri:

- li cavatuna ci li pò calari !

4

Ci l’hannu sia li beddi ca li brutti, 

chisti nun sù palori ma sù fatti,

lu cellulari cunquistà a tutti

e ormai lu vonnu li cani e li gatti.

Sciuri, profumi, robi e anchi cullani,

si rigalava pi San Valentinu,

ma oggi cu sti modi assai baggiani,

lu megliu donu è lu telefoninu.

5

Ormai ci nni sù in giru miliuna

ca signu sù  di tecnologia,

e fannu beati certi babbasuna

chi vannu chiacchiariannu via via.

Don Mimu lu talìa assai priatu

ed anchi s’un ci servi l’avi appressu,

di st’apparecchiu è troppu ‘nnammuratu

e si lu porta ‘nzina ‘nti lu cessu.

6

Quarchi atru si lu porta anchi a la missa,

e c’è cu l’utilizza chiazza chiazza,

c’è cu gisticulìa comu un fissa

e tanta genti pari propriu pazza.

Un medicu ch’è sempri assai ‘mpignatu

‘nzigna li curi anchi strati strati,

‘na vota d’un pazienti fu chiamatu

ca li supposti li vulia canciati.

7

Si chiamanu  l’amici e anchi li ziti,

li nori, li cugnati, soru o frati,

ma in certi casi un mancanu li liti,

pirchì li costi sunnu assai salati.

A voti lu signali è disturbatu 

‘nta zoni ca nun captanu l’ondi,

e quarchidunu comu un dispiratu

pi sèntiri si metti a culu a ponti.

8

Stu simplici gingillu fa smaniari,

fa divintari stoliti e nirbusi,

fa ‘ncretiniri si un si sapi usari

perciò è megliu nun ni fari abusi.

Ma un meritu ci l’avi sta invenzioni,

ca cu è luntanu si senti vicinu,

e siddu  po’  riuniri li Nazioni, 

sia benvenutu lu telefoninu.