1

Ci dettiru la patenti a mè muglieri

e ‘na cincucentu ci ivu accattari,

ora si po’ girari li quarteri

pi uri e uri senza mai stancari.

Tranquilla acchiana puru chiazza chiazza

e nun si scanta mai, mancu ‘na stizza,

mi pari ‘na pilota di gran razza

ca mostra assai talentu e sicurizza.

2

Trova la scusa in centu e cchiù maneri

e nun finisci mai di circulari,

guidari ci piaci e vulinteri

tanti  surbizza si li po’ sbrigari.

A lu mercatu và a fari la spisa,

po torna e nesci arrè cu n’atra scusa,

scappa pi un francubullu o ‘na cammisa

c’è d’ammiralla ca nunn’è lagnusa.

3

Ribera ‘ncapu e sutta si firrìa,

si ferma, acchiana e scinni senza noia,

va a Santa Teresa o a la Cunciria

ca lu guidari p’idda è granni gioia.

Và a lu Puzziddu ed anchi a lu Spitali,

và ‘nti lu Cozzu di Mastrugiuanni,

un satu a la Varianti e a lu Canali,

cussì Ribera nun ci pari granni !

4

Passa pi Via Fazzellu e Parlapianu,

pi Via Crispi e sterza ‘ntra pinninu,

oltri la Via Roma c’è Via Nanu

e scinni dritta pi Sant’Antuninu.

Po’ gira pi Viali Resistenza,

pi Corsu Margherita e nun finisci

và in Via Bonifaciu e Via Chiarenza

e infini ‘nti la strata di li pisci !

5

Và paga li bulletti a la Posta

e li cartelli ‘nti l’Esatturia,

spiduglia li chiffari senza sosta

e và a lu furnu e a la macelleria.

Aviri la muglieri appatintata

è cosa cumudissima e gradita,

ca prima vulia essiri accumpagnata

e unn’era mai tranquilla la me vita.

6

Ormai canusci tuttu lu paisi

e cu prudenza sempri sta a guidari,

‘nti tanti banni và facennu spisi,

ca a la famiglia si cciavà pinsari !

Però ‘na cosa  mi fa ‘nfirnisciari,

com’è ca lu stipendiu un po’ abbastari ?

 ma ora ca ci pensu - chi ruvina !

anchi la cincucentu và .....a benzina !