Di tutti quanti è cosa risaputa
ca sta Ribera è veramenti amata,
e anchi siddu è mezza distruduta
si vanta ogni pirsuna ca c’ è nata.
Ma è inutili però ca ‘nni vantamu
d’aviri stu paisi assai ‘mpurtanti,
ca siddu cu attenzioni lu taliamu
scupremu ca di guai ‘nn’avi tanti.
|
Li sò jardina su ‘na meraviglia
ma l’acqua è un continuu turmentu,
ci curpa quarchi testa di caniglia
ca si ‘nni futti di stu malabbentu.
E và a finiri ca l’agriculturi
doppu c’ha datu l’anima e lu cori
‘nni soffri e si dispera criaturi
ca lu jardinu senza l’acqua mori !
|
|
Vularu seggi, quatri e macchinari,
e tanti stanzi foru incendiati,
agricultura stanchi d’aspittari
parianu veri pazzi scatinati.
Ed ora semu tutti spaisati,
senza Comuni e senza cchiù spiranza,
senz’acqua, né progetti e abbannunati
cu un purpu tutti quanti ‘nti la panza.
|
Però la vita avà continuari,
basta cu li scunforti e li pauri,
li rivilisi sannu assai luttari
e un vidinu né munti e né chianuri.
Ribera a luttu nun ci voli stari
ca un merita davveru stu distinu,
la vita allegra prestu avà turnari
ca nun po’ stari fermu …… Ciccanninu !
|
|
Ci sunnu cintinara d’emigrati,
e tanti cittadini residenti,
ca a lu paisi sunnu assai ligati
e vonnu ca iddu torna assai ridenti.
|
Curaggiu caru Sinnacu e assissura
cu impegnu e forza dativi da fari
purtati arrè Ribera a lu splinduri
ca Ciccanninu ancora avà sunari !
|
