O mamma, è la tò festa e prestamenti

ti vogliu didicari sti palori,

li scrissi pi l’eternu ‘nti la menti

e mi foru dittati di lu cori.

Chi sinsazioni quannu dicu; “mamma” !

tu sì pi mia la cchiù lucenti gemma,

iu sugnu lu caminu, tu la fiamma,

iu sugnu la bannera e tu lu stemma.

La luci tò rishiara la nuttata

e la tò gioia leva ogni tristizza,

tra tanti perli sì la cchiù disiata,

comu disiata è ogni tò carizza.

L’affettu c’haiu pi tia un si po’ spiegari

e ti vulissi accantu a tutti l’uri,

unn’haiu regali, ma ti vogliu dari

o cara mamma, “tuttu lu mè amuri”.

_____________________________________________________________

Poesia recitata da una bambina molto povera, iscritta presso

la Scuola elementare S. Giovanni Bosco di Ribera,

in occasione della Festa della mamma, nel mese di maggio del 1997.