|
|
|
|
Menù Poesie :
LA MIA TERRA AMORI E AFFETTI
PER RIFLETTERE
VERSI...ESTROVERSI
|
BEDDA SI’ TU
Lu mari po’ canciari lu culuri, lu celu chiaru si po’ annivulari, po’ pèrdiri lu suli lu splinduri, ma tu sì sempri bedda e fai ‘ncantari.
Po’ l’acqua cchiù la siti nun livari, li sciuri ponnu perdiri l’oduri, po’ l’aria frisca cchiù nun rinfriscari, ma tu nun canci mai pi mia amuri.
Bedda sì tu, biddizzi ‘nn’hai a migliara, bedda sì tu, cchiù bedda di li stiddi, fai duci la me vita quannu è amara cu li lucenti e granni to pupiddi.
Bedda sì tu, e diliziusa, e cara, e addumi attornu a mia milli faviddi, bedda di tuttu, ogni cosa hai rara : l’occhi, la vucca e anchi li capiddi.
Chi avissi a fari sulu e senza tia ? senza la tò biddizza e lu tò affettu ? scopu unn’avissi cchiù sta vita mia, parissi ‘na casuzza senza tettu,
‘na seggia cu tri gammi ca travìa, ‘na varca senza rimi in mari apertu, parissi un vagabunnu senza via, cu tantu di duluri intra lu pettu.
Bedda sì tu e tantu iu ti amu, ‘nsemmula uniti gudemu e suffremu e anchi si sulu d’amuri campamu, sempri felici in eternu saremu.
Maria Tornetta, moglie di G.Nicola Ciliberto
|
