AD ALESSANDRO

(Dedicata al mio secondo figlio Alessandro)

Di quannu stu secunnu figliu è natu

la mè filicità assai è crisciuta,

cchiù lu taliu e cchiù sugnu 'ncantatu

pi st'atra criatura ch'è vinuta.

Nun vi lu sacciu diri quantu è beddu,

quant'è vivaci e duci stu pupiddu,

'nta la facciuzza pari un bammineddu

e spanni oduri megliu d'un sciuriddu.

Di nomu Alessandru lu chiamamu

e 'nta lu cori sempri lu stringemu,

comu 'na perla rara lu taliamu

e di vasati in dù 'nni lu spartemu.

Cu sò fratuzzu sempri sta a jucari

e li diritti sò li fa valiri,

iu mi 'nni godu e staiu a taliari

e sempri appressu a iddi vogliu iri.

Ci jocu urati sani e un pensu a nenti

e vivu d'alligrizza sti mumenti.