RIBERA
(Testo e Musica di Giuseppe N. Ciliberto)
Sentu un’aria frisca stamatina
ca fa alligrari a tutti ‘nta lu cori,
è un’aria prufumata e supraffina
ca a discrivilla un trovu li palori.
‘Nti stu paisi beddu e chianu chianu
d’attornu notti e jornu ci firria,
purtata di lu ventu pi la manu
pi dari ad ogni casa l’alligria.
Li sò primizzi ‘nti lu munnu interu
sù rinumati, sunnu tantu rari,
l’oduri e lu sapuri sù un misteru
ca la natura nun lu po’ spiegari.
Chistu profumu cu lu potti fari ?
Sulu ‘nti sti centrati si po’ aviri,
è dilicatu, puru e fa ‘ncantari,
biatu chiddu ca lu po’ sintiri.
O mia Ribera cara mè citati,
cu li casuzzi tantu sapuriti,
cu li stratuzzi tutti allineati,
ca ‘nti nuddu paisi li viditi.
O mia Ribera cara mè citati,
cu li casuzzi tantu sapuriti,
cu li stratuzzi tutti allineati,
ca ‘nti nuddu paisi li viditi.